Partneritet Publike Private në Shqipëri

Zbulo kontratat, kompanitë koncesionare dhe burimet e financimit

Databaza e projekteve koncesionare dhe të Partneritet Publik Privat të nënshkruara nga qeveria shqiptare gjatë periudhës 2004-2020.

Ndërtimi i hidrocentraleve Rapun 3, Rapun 3A dhe Rapun 4

Kontrata koncesionare është lidhur ndërmjet Ministrisë së Ekonomisë, Tregtisë dhe Energjitikës dhe shoqërive C & S Construction shpk, Ferar shpk dhe Gjikuria shpk.
Objekti i kontratës është: financimi, projektimi, ndërtimi, vënia në punë, administrimi, mirëmbajtja e hidrocentraleve Rapun 3, Rapun 3A dhe Rapun 4 në lumin e Rapunit, rrethi Librazhd. Në fund të periudhës koncesionare, objektet do të transferohen tek Autoriteti Kontraktues.

Kontrata është e formës BOT (ndërtim, operim dhe transferim i të drejtës së pronësisë dhe operimit në fund të kontratës së koncesionit tek Autoritetit Kontraktues). Shoqërisë koncesionare nuk i lejohet të kryejë asnjë lloj tjetër aktiviteti përveç ndërtimit të hidrocentraleve, pra vetëm ato aktivitete që është nënshkruar kjo kontratë. Për të plotësuar këtë objektiv të kontratës, koncesionari duhet të kryejë veprimet si më poshtë:
• Të projektojë, financojë, ndërtojë, testojë, të ketë në pronësi, të operojë dhe të mirëmbajë hidrocentralin.
• Të ketë gëzim të qetë të sheshit ku do të zhvillojë punimet.
• Kur periudha e koncesionit përfundon, koncesionari duhet t’i kthejë Autoritetit Kontraktues përdorimin e sheshit, t’i transferojë pronësinë e hidrocentraleve dhe të objekteve të shtuara.
• Koncesionari duhet të ketë të drejtën ekskluzive ndaj çdo atributi mjedisor që mund të ketë nga projekti.
• Autoriteti Kontraktues do të mbështesë çdo aplikim që mund të dorëzohet nga koncesionari tek autoritetet përkatëse në lidhje me Mekanizmat e Zhvillimit të Pastërtisë (Clean Development Mechanism) dhe me marrjen e miratimit nga Ministria e Mjedisit.
Koncesionari do të marrë në dorëzim sheshin dhe objektin ekzistues dhe mund ta shtojë ose ta zgjerojë atë. Koncesionari ka të drejtën e gëzimit të qetë të sheshit që do të thotë të mos ketë asnjë ndërhyrje të parregullt nga Autoriteti Kontraktues apo nga ndonjë autoritet tjetër shtetëror. Në fund të periudhës së koncesionit, koncesionari duhet t’i kthejë Autoritetit përdorimin e sheshit, t’i transferojë pronësinë e hidrocentralit dhe të objekteve ekzistuese të shtuara.
Koncesionari merr në përdorim sheshin në gjendjen siç është. Autoriteti Kontraktues nuk do të kryejë asnjë shpenzim dhe nuk duhet të jetë përgjegjës për ndonjë pretendim që mund të ketë koncesionari në lidhje me gjendjen e sheshit. Nëse për gëzimin e sheshit, koncesionarit do t’i nevojiten edhe shpronësimi i truallit që është pronë private, atëherë ai duhet të paraqesë tek Autoriteti Kontraktues të gjitha dokumentet përkatëse dhe argumentet e duhura së bashku me parcelat e sakta që do të shpronësohen. Autoriteti Kontraktues mund të miratojë shpronësimet, por të gjitha kostot e lidhura me shpronësimin do të mbulohen nga koncesionari.
Autoriteti Kontraktues ka të drejtë të monitorojë koncesionarin çdo 3 muaj për të verifikuar ecurinë e punimeve dhe të projektit.
Kohëzgjatja e koncesionit është 35 vjet.
Autoriteti Kontraktues garanton blerjen e energjisë elektrike nga subjekti i furnizimit të energjisë elektrike përmes një kontrate afatgjatë nëse kjo gjë kërkohet nga koncesionari.
Autoriteti Kontraktues duhet të ndihmojë që koncesionari të sigurojë të gjitha lejet, licencat në mënyrë të tillë që të nisë puna dhe në të gjitha marrëdhëniet e koncesionarit me autoritetet shtetërore.
Autoriteti Kontraktues duhet të garantojë koncesionarin që ndërtimi i veprave të tjera hidroteknike në të njëjtën rrjedhë nuk do të ndikojë në mbarëvajtjen e projektit.
Koncesionari duhet të krijojë një shoqëri koncesionare për të nisur punimet brenda 30 ditësh nga hyrja në fuqi e kontratës. Koncesionari dhe shoqëria e re e krijuar do të jenë solidarisht përgjegjës për të gjitha të drejtat dhe detyrimet në kontratën e koncesionit.
Koncesionari duhet të ruajë ekosistemin, sasinë e ujit ekologjik në shtratin parësor të lumit/rrjedhës dhe të parandalojë ndotjen e mjedisit, duhet të zbatojë Kodin e Punës dhe duhet të mbulojë të gjitha shpenzimet dhe dëmet që mund të shkaktohen mbi Autoritetin Kontraktues ose palë të treta. Koncesionari duhet të parandalojë ndotjen e mjedisit dhe ta kthejë atë në gjendjen e mëparshme me shpenzimet e veta.
Koncesionari merr përsipër të vërë në punë hidrocentralet brenda 48 muajve nga hyrja në fuqi e kontratës. Koncesionari do të nisë punimet brenda 30 ditësh nga marrja e lejes së ndërtimit.  Aplikimi për pajisjen me leje do të kryhet brenda 30 ditëve nga miratimi i projektit përfundimtar nga Autoriteti Kontraktues.
Totali i investimeve është 790’361’250 ALL, nga të cilat 349’270’000 ALL do të investohen në makineri dhe pajisje.
Koncesionari duhet të sigurojë hidrocentralet, pajisjet e punës, punimet e ndërtimit/ montimit dhe çdo dëm që mund t’u shkaktojë të tretëve. Ai duhet të ngurtësojë pranë një institucioni bankar ose shoqëri sigurimesh 10% të vlerës totale të investimit. Në këtë rast, nëse koncesionari nuk i plotëson detyrimet e tij atëherë Autoriteti Kontraktues mund të marrë këtë shumë ose pjesë të kësaj shume si rrjedhojë e zbatimit të penaliteteve mbi koncesionarin.
Tarifa koncesionare do të jetë si më poshtë:
• Nga viti 1 – 14, tarifa do të jetë 2% e prodhimit vjetor të energjisë elektrike.
• Nga viti 15 – 24, tarifa do të jetë 2.5% e prodhimit vjetor të energjisë elektrike.
• Nga viti 25 – 27, tarifa do të jetë 2.6% e prodhimit vjetor të energjisë elektrike.
• Nga viti 28 – 31, tarifa do të jetë 3.1% e prodhimit vjetor të energjisë elektrike.
• Nga viti 32 deri në vitin e fundit, tarifa do të jetë 5% e prodhimit vjetor të energjisë elektrike.
Koncesionari duhet të riinvestojë 60% të vlerës së makinerive dhe pajisjeve duke filluar nga viti i 25 –të nga hyrja në fuqi e kontratës.
Koncesionari nuk mund të ndryshojë përqindjen e pjesëmarrjes në aksionet e saj ose transferimin e tyre tek persona të tretë pa marrë më parë miratimin e Autoritetit Kontraktues.
Koncesionari mund të nënkontraktojë një pjesë të shërbimeve të tij por vetëm pasi të ketë marrë miratimin e Autoritetit Kontraktues dhe jo për më tepër se 50% të vlerës së investimit.
Koncesionari ka të drejtë të vendosë peng, hipotekë apo ndonjë barrë tjetër mbi aktivet që do të krijohen dhe mund të lidhë çdolloj marrëveshjeje financimi për sa kohë pengu, hipoteka dhe marrëveshja e financimit të shërbejnë që të përmbushet qëllimi i kësaj kontrate.
Në fund të periudhës, Koncesionari duhet të transferojë pa kundërshpërblim tek Autoriteti Kontraktues: hidrocentralin dhe objektet ekzistuese të lidhura me të, ndërtesa, makineri, pajisje, pronësinë mbi ndërtesat apo impiantet e ndërtuara, të drejtat kontraktore, dorëzimin e librave, dokumenteve dhe garancive. Procesi i dorëzimit do të nisë 6 muaj përpara përfundimin të periudhës së koncesionit.

Kompania
C & S Energy
Përshkrimi i kompanisë
Objekti i veprimtarisë: ndërtimi i hidrocentraleve sipas kontratës së konçesionit. Shoqëria është themeluar më 12.11.2009. Kapitali i saj është 85'000'000 ALL.
Aksionerët

Fondacioni Kryepiskopi Anastas - 100% të kuotave

Persona dhe entite të lidhura
Harallambe Gjoka - administratori aktual (18.12.2012 - 18.12.2022)
Arjan Çukaj - administrator (12.11.2009 - 18.12.2012)


Më 12.11.2018, EKO Vepra i ka dhuruar 100% të kuotave të shoqërisë Fondacionit Kryepiskopi Anastas. Tashmë, Fondacioni Kryepiskopi Anastas zotëron 100% të kuotave.
Më 20.12.2012 është larguar ortaku C & S Construction dhe tashmë EKO Vepra zotëron 100% të kuotave.
Më 24.05.2016, Përmbaruesi Gjyqësor Privat Eno Shkoza ka lëshuar pranë shoqërisë BSE Bailiff Service Executive shpk urdhrin për masën e sekuestros konservative mbi pjesët/ kuotat/ aktivet që shoqëria C & S Energy shpk zotëron tek shoqëritë e tjera. Më 27.05.2016 kjo masë është pushuar së ekzekutuari.
Më 20.12.2012, është vendosur shitja e kuotave të shoqërisë C & S Construction tek ortaku i ri EKO Vepra. është zvogëluar kapitali i C & S Construction nga 100% në 2% të kuotave. EKO Vepra zotëron 98% të kapitalit.
Më 15.06.2012 është larguar ortaku Ferar i cili i ka shitur kuotat e tij ortakut C & S Construction. është rritur kapitali i C & S Construction nga 52 % në 100% të kuotave.
Më 14.06.2012 është larguar ortaku Gjikuria, i cili i ka shitur kuotat e tij ortakut C & S Construction. është rritur kapitali i C & S Construction nga 50% në 52% të kuotave.

Vendndodhja