Koncesionari do të kryejë veprimet si më poshtë:
• Punime të tilla si: kaptazh, linjë dërgimi në drejtim të molit, rrugë lidhëse me rrugën nacionale, fabrikë imbotilimi.
• Transporti detar dhe tokësor për transportin e ujit në tregun vendas dhe të huaj.
• Uji që merret nga kaptazhi do të kalojë në matësin e ujit dhe do të futet në rezervuarin e pritjes së ujit.
• Depozitimi i ujit në rezervuarë për të vazhduar proceset dhe vijimësinë sasiore konstante në raport me kohën.
• Linja e formimit dhe mbushjes së shisheve e cila do të prodhojë shishe brenda standardit.
Koncesionari do të marrë në përdorim sheshin, por nëse për kryerjen e punës së tij do të nevojitet edhe shpronësime të truallit që është pronë private, atëherë koncesionari do t’i paraqesë këtë kërkesë Autoritetit Kontraktues së bashku me dokumentet dhe argumentet përkatëse. Autoriteti Kontraktues mund të miratojë propozimin për shpronësime të truallit, por të gjitha shpenzimet dhe kostot në lidhje me këto shpronësime do të mbulohen nga koncesionari.
Sasia e ujit që do të jepet në përdorim do të jetë 50 l/sek për periudhën 15 qershor – 30 tetor dhe 200 l/sek për periudhën 1 nëntor – 15 qershor.
Nuk duhet të ndalohet dhe të devijohet rrjedhja e ujit nga shtrati natyral i përroit. Për të kapur sasinë e ujit të përcaktuar në kontratë dhe për të mbrojtur ujin nga ndotjet do të ndërtohet një kaptazh me 2 mjedis vendgrumbullimi dhe dhoma e manovrimit. Nga ky kaptazh, uji do të kalojë në fabrikën e imbotilimit dhe në molin e ngarkimit të anijeve.
Kohëzgjatja e koncesionit është 20 vjet, por më vonë kjo është ndryshuar në 35 vjet.
Koncesionari ka të drejta ekskluzive për të përdorur ujin e burimit Sasaj, Bunec, Sarandë.
Autoriteti Kontraktues do të ndihmojë koncesionarin për të siguruar autorizimet, lejet dhe licencat në mënyrë në raport me institucionet shtetërore në varësi të Autoritetit Kontraktues ose me institucione të tjera në mënyrë që koncesionari të nisë sa më parë punën.
Në fund të periudhës koncesionare, koncesionari do t’i dorëzojë Autoritetit Kontraktues të gjitha asetet dhe dokumentet në lidhje me koncesionin pa asnjë lloj detyrimi apo barre dhe në gjendje funksionale.
Tarifa koncesionare që koncesionari do t’i paguajë Autoritetit Kontraktues është 2% e fitimit vjetor të realizuar nga shitjet duke përjashtuar TVSH – në brenda dhe jashtë vendit. Koncesionari do të ketë mundësi që të përfitojë pagesa për përdorimin e mjetit të infrastrukturës (pontilit) për të eksportuar ujin e burimit Sasaj dhe të tregtimit të tij.
Koncesionari ka të drejtë të vendosë hipotekë, peng apo barrë tjetër mbi aktivet që do të krijohen dhe do të hyjë në çdo lloj marrëveshje financimi me çdo palë të tretë me kusht që hipoteka, pengu apo barra dhe marrëveshja financuese të shërbejnë për të përmbushur objektivin e kontratës së koncesionit.
Koncesionari do të riinvestojë 15% të vlerës së investimit për makineritë dhe pajisjet duke filluar nga viti i 8 – të para përfundimit të kësaj kontrate.
Autoriteti Kontraktues mund të ushtrojë jo më shumë se 2 kontrolle financiare në vit.
Autoriteti Kontraktues do të garantojë koncesionarin që ushtrimi i veprave të tjera të ngjashme në zonën përreth vendit ku ky i fundit kryen aktivitetit nuk do të cenojë mbarëvajtjen e projektit dhe nuk do të shkaktojë dëme financiare mbi koncesionarin. Në rast të kundërt, koncesionari ka të drejtë të kërkojë mbulimin e këtyre dëmeve.
Koncesionari merr përsipër të fillojë punimet për zbatimin e projektit brenda 90 ditësh nga data e hyrjes në fuqi të kontratës. Koncesionari merr përsipër që linja do të vihet në shfrytëzim brenda 14 muajve dhe se do të nxjerrë ujin në treg brenda 6 muajsh nga hyrja në fuqi e kontratës.
Nëse koncesionari evidenton që mund të kryhen përmirësime në zbatimin e një teknologjie të re më të përparuar, në përmirësimin e proceseve, në përmirësimin e cilësisë dhe në përmirësimin e shërbimit ndaj klientëve, ai duhet të njoftojë fillimisht Autoritetin Kontraktues në lidhje me këto përmirësime dhe mund t’i zbatojë ato vetëm pasi të ketë marrë miratimin e tij.
Autoritetit Kontraktues do të dëmshpërblejë dhe mbrojë koncesionarin nga pretendimet e ndonjë pale të tretë nëse dëmet janë shkaktuar për shkak të Autoritetit dhe anasjelltas.
Koncesionari mund të nënkontraktojë një pjesë të shërbimeve por jo për më tepër se 30% të vlerës së kontratës dhe jo pa miratimin paraprak të Autoritetit Kontraktues.